Påskeferien er knappast tilbakelagt og universalklisteret heng i tjukke lag under skia. Men for somme kan fotballsesongen aldri starte tidleg nok! Og etter tallause timar på parketten i Suldalshallen i vinter og tri treningskampar i vår var serien endeleg i gong. Og etter eit spennande lokaloppgjer drog Suldalsgutane sigeren i land mot Sauda.
Men det starta med nokså rufsete spel både framme og bak på banen. Feilpasningar, svake mottak, og sjansesløseri hjå begge lag gjorde at det vart noko Hawaii-preg over førsteomgangen. Eller hiakka hoakka som somme på Haugalandet seier. Det var likevel Sauda som kom best utav det i starten. Først skora dei på eit langskot. Like etter opplevde Mikkel Wigestrand det same som kollega Indridi Sigurdson i Viking seinare på kvelden: Eit ufarleg skot sneier borti foten, får ei retningsforandring og trillar i mål inne ved stolperota. Det står 2-0 til Sauda etter eit kvarter
Men Suldal bruker ikkje lang tid på å kvittere. Etter 18 minutt er det frispark like utanfor 16-meteren. Medan Saudaspelarane er opptatt med å organisere muren skyt Ingvald Halgunset ballen i mål via stolpen. Og no har Suldal fått meir grep om kampen. Fleire fine angrep vert rulla opp og på eit av dei får Terje Nevøy plassert ballen i mål etter innlegg frå Hallvard Erfjord. Ikkje lenge etter er det Johannes Wigestrand som dreg fram høgreslegga og dundrar inn 3-2 til Suldal. Men leiinga varer ikkje til pause. Etter forsvarsrot med svake klareringar utliknar Sauda på eit langskot.
Etter ein jamnspelt førsteomgang er det suldalsgutane som tek over kampen etter pause. Etter fleire store sjansar er det Christian Smithson som sender Suldal i føringa på ny. Sauda gir ikkje opp og dei har sine sjansar til å utlikne. Kampen vert ikkje avgjort før heilt mot slutten. Suldal trykker på og til slutt er det 2 presise kornerar frå Sander Deilkås som vert avgjerande. Den første klarer Hallvard å pirke i mål ved første stolpe. Den andre stongar Ingvald i nota. Sauda reduserer heilt på tampen, men Suldal vinn fortent.
Kampen bekrefter at den offensive slagkrafta er god. 6 mål av 5 ulike målskorarar er bra. Så får heller den defensive tryggleiken kome etter kvart.
Neste kamp er heime i Prestevikjo mot Sveio tysdag 17 april
Mål:
1-0: Sauda
2-0: Sauda
2-1 Ingvald Halgunset
2-2: Terje Nevøy
2-3: Johannes Wigestrand
3-3: Sauda
3-4 Christian Smithson
3-5: Hallvard Erfjord
3-6: Ingvald Halgunset
4-6: Sauda
Lag: Oddbjørn Lund, Stian Jelsa, Mikkel Wigestrand, Pål Erik Landsnes, Lars Lavalette, Terje Nevøy, Ingvald Halgunset, Johannes Wigestrand, Christian Smithson, Hallvard Erfjord, Tim
Innbyttarar: Karl Georg Erfjord, Peterson Tijhuis, Sander Deilkås,,Håkon Vanvik.