Hovudsponsorar
Sponsorar
Sponsorar
Sparebanken Norge slår på stortromma – igjen! Kr 400.000 til Prosjekt Prestavikjo!
Sparebanken Norge hadde i går ein ny runde med tildelingar til gode formål i Suldal, nesten 1,2 million kroner delte dei ut på kaien på Sand, og 1/3 av desse midlane gjekk til Prestavikjo.
Desse midlane gjer at me kan gå i gong med asfaltering av Nordre sving og få på plass etterlengta ballfangarnett, padeltennis og fleirbruksbane. Det er ikkje til å legga skjul på at pris på grunnarbeid og asfaltprisar er usikre og stadig endrande tal. Det hjalp ikkje på asfaltprisane at det blei blokkade i Hormuzstredet. Tilskotet frå Sparebanken Norge var gull verd og kom i akkurat rett tidspunkt. Hans Olav frå banken kom med den gode meldinga ti minutt før me skulle setta oss ned og sjå på økonomien i prosjektet, så det blei eit lystig møte, og eit kortare møte enn me hadde sett føre oss.
Med denne gåva har nå Sparebanken Norge gitt heile 1,4 million til «Prosjekt Prestavikjo – eit nærmiljøanlegg for alle!». Det er heilt fantastisk, og me er kjempeglade for å ha ein så solid støttepartnar. Det er også veldig kjekt at også mange andre i kommunen nyt godt av deira støtte. Vår gode nabo og samarbeidspartnar Suldal Samfunnshus fekk også 100.000 til energitiltak, noko me applauderer! Fleire andre i bygda, og totalt 18 organisasjonar i kommunen naut godt av gåverunden i vår.
Under ser de alle gåvemottakarane, og de kan lesa meir i Suldalsposten
Tusen takk nok ein gong!
Gåvesjekken frå SR-Bankstiftinga er på plass!
Som tidlegare meldt, støttar Sparebankstiftinga SR-Bank Prosjekt Prestavikjo med nye kr 100.000,- Desse pengane er øyremerka sandvolleyballbane.
Vibecke Helland frå SR-Bank kom og overrakte det synlege provet på gåva, og bildet blei tatt der sandvolleyballbanen skal komma. Det blir midt i søndre sving, og kanskje er den på plass til neste sommar.
Me takkar igjen for gåva frå banken, det er stas og ha dei med på laget!
6. div: Finnøy – Suldal 1-2
A-laget har nå tre strake bortesigrar og er i flyten. Nå står ein bortekamp mot Lura før tur før me endeleg får sjå laget vårt på heimebane i Prestavikjo i ein tøff kamp mot Hjelmeland laurdag 13. juni kl 13.00.
Det var ulike framkomstmiddel som måtte til for å komma seg til kamp. Ein liten smakebit her:
Denne gong nyttar me oss av eit balansert og godt referat frå Finnøy si lokalavis Øyposten. Klikk deg vidare i saka for og lesa.
read more…Sparebankstiftinga SR-Bank støttar Prosjekt Prestavikjo med nye kr 100.000!
Sparebankstiftinga har nok ein gong sett verdien av arbeidet me gjer for å gjera Prestavikjo til ein kjekk stad for flest mogleg, og har denne gong støtta med tilskot til sandvolleyballbane.
Denne banen er tenkt i søndre sving, bak målet mot Suldalslågen. Her er tanken at ein skal kunna spela både sandvolleyball, leika i sanden, og kanskje også legga til rette for sandhandball- og fotball.
Det er ikkje første gong Sparebankstiftinga SR-Bank støttar Prosjekt Prestavikjo. Første gong var då dei gav kr 100.000,- til tribune i 2022. Det er altså alt fire år sidan me starta opp med prosjektet, sjølv om bygginga ikkje tok til før i 2023. I 2023 gav stiftinga 500.000,- i generell støtte til Prosjekt Prestavikjo. I tillegg har dei også gitt kr 25.000,- i eldsjelgåve som er blitt lagt inn i prosjektet. Med tildelinga i år er SR-bank dermed oppe i totalt kr 725.000,- i støtte til Prosjekt Prestavikjo – eit nærmiljøanlegg for alle!
Suldal idrettslag takkar så mykje for støtta, desse midlane er heilt naudsynte for at me skal greia invisteringane me er i gong med, og ønskjer å halda fram med i Prestavikjo!
Kr 100.000 frå Sparebankstiftelsen Sauda til innreiing av utstyrslager
Suldal Idrettslag er svært takksame for å ha blitt tildelt kr 100 000 i prosjektstøtte frå Sparebankstiftelsen Sauda.
Støtta går til innreiing av utstyrsgarasjen, som er eit viktig tiltak for å sikre betre organisering av utstyr og meir effektiv drift i laget. Med ei betre tilrettelagt løysing vil både utøvarar, trenarar og frivillige få ein enklare og meir oversiktleg kvardag.
Tildelinga er ein del av ei større runde med prosjektmidlar til gode føremål i Sauda og Suldal, med mål om å styrke aktivitet, trivsel og gode møteplassar i lokalsamfunnet.
Suldal Idrettslag set stor pris på støtta frå Sparebankstiftelsen Sauda, som over tid har vore ein viktig bidragsytar til utvikling av laget og aktivitetstilbodet vårt.
Me takkar for tilliten og støtta.
👉Nye lagermoglegheiter for Suldal Idrettslag | Suldal idrettslag
Ryddedugnad i bygda!!
Tysdag ettermiddag 21.04 skal me ut og rydda lokalmiljøet for søppel – og tena pengar samstundes 
Bli med på Plastdugnaden og gjer ein forskjell! 
Dette er mogleg takka vere plastposekontingenten frå medlemmene i Handelens Miljøfond, med støtte frå SpareBank 1-stiftingane.
Tusen takk til dei lokale som støttar oss:
Coop Prix, som spanderer bollar og saft til ungane som skal vera med å rydda
Mibau Stema Norge, som held oss med eingongshanskar og søppelsekkar
Vinjar Skule blir òg med og bidreg! Og det er jo berre heilt fantastisk! Dei tek ein rydderunde fredag 24.04, og me håpar at store delar av osen er rydda etter dette 
Me syns det e så kjekt at så mange lokale bedrifter og skulen hiv seg med – det gjer det ekstra kjekt og viser ekte fellesskap.
Ta godt imot ungane som kjem rundt og ryddar hos oss 
Fotballkampar våren 2026
Nå er både a-lag og Suldalsgutane- og jentene i gong for fullt. Denne veka er det verkeleg full rulle i Prestavikjo, og meir blir det.
Fotballmaraton i Prestavikjo starta laurdag med a-laget, før J13 hadde sin første kamp på søndag. Måndag spelte G14, og i dag var det G15 sin tur. I morgon heimedebuterer G13, mens J15 avsluttar veka med kamp på måndag. Fleire har fått med seg alle kampane til nå, kor mange greier å kryssa av seks dagar på rad på tribunen i Prestavikjo!?
Her følgjer ei oversikt over kampane i Prestavikjo fram til sommaren. Legg også ved heimekampane som er klar etter sommaren (a-lag og Suldalsserie). Terminlista for Suldalsgutane- og jentene for hausten kjem i sommar. Det blir mange høve til å sjå fotball i år også.
Dei kampane som er merka gult skal det i utgangspunktet vera kiosk på. Kaffi skal det i tillegg vera råd og få kjøpt på dei fleste Suldalsgutane- og jentene-kampane.
Vår eminente SoME-ansvarlege Tom vil nok legga ut mange påminningar om kamp, han har lagt lista høgt!
Vèl møtt!
Nye lagermoglegheiter for Suldal Idrettslag
Suldal Idrettslag har denne veka overtatt bruken av den gamle brannstasjonen på Suldalsosen, etter å tidlegare i år ha inngått avtale med Suldal kommune om å disponera bygget. Bygget er framleis eigd av kommunen.
Idrettslaget har arbeidd med å få på plass denne avtalen heilt sidan det kom rykte om at det skulle byggast ny brannstasjon på Suldalsosen.
Bygget er på om lag 135 m², og formålet er garasje. Det er innlagt både straum og vatn, og allereie denne veka blei det montert vassmålar for å sikre kontroll og halde driftskostnadene så låge som mogleg. Idrettslaget skal stå for drift og eventuelle vedlikehaldskostnader knytt til bruken av bygget.
Plasseringa er òg god med tanke på den planlagde asfalterte turvegen som skal koma rett utanfor bygget.
Bygget vil bli brukt som utstyrslager for idrettslaget. Dette vil mellom anna sikre betre oppbevaring av utstyr, deriblant snøkanonar som no endeleg kan stå tørt og trygt. I tillegg håpar ein at det vil gjera det enklare for fellesutstyr og dei ulike gruppene å ha utstyr samla på éin stad.
Suldal IL ser på dette som eit positivt løft for drifta av laget og ei praktisk forbetring for dei mange frivillige som legg ned ein stor innsats gjennom året.
Idrettslaget er takksame for godt samarbeid med kommunen og ser fram til å ta bygget i bruk til beste for både laget og lokalmiljøet.
Video og bilde: Tom Gardsteig
6. div: Suldal – Pol/Tasta 2 2-1 (1-1)
Det nysamanslåtte laget Pol/Tasta kom laurdag på besøk med 2’ar-laget sitt på ein strålande, men vindfylt dag.
Me kjenner godt til både Pol og Tasta frå før, og spesielt Pol har me hatt både kampar og sosialt lag med tidlegare. Nå har desse to klubbane som tidlegare delte bane slått seg saman. Kanskje har dei også slått ned veggene i klubbhuset dei hadde kvar sin ende av?
Førstelaget deira hadde kamp fredagskveld, og det var fleire som var med på den kampen som også stilte til start i Prestavikjo. To fotballkampar på under eit døgn for desse, altså! Sterke resultat tidlegare i sesongstarten gav dei nok tru på at det skulle gå an og få til eit godt resultat.
read more…Årsmøte, frivilligfest og 80 år!
Laurdag 14. mars slo me tre floger i ein smekk: Årsmøte, frivilliigfest og ei lita feiring av at idrettslaget er 80 år i år.
Me er ikkje bortskjemde med fulle hus når me har årsmøte. Me tenkte me ville gjera ein liten vri og legga det til ein laurdag med påfølgande frivilligfest etterpå i år. Ein kan nok ikkje hevda at dette grepet trekte fleire medlemmer til årsmøtet. Det var ikkje meir enn ti som møtte med stemmerett, men det var nå i alle fall nok til å vera vedtaksføre. Kolliesjon med Birken og skirenn på Voss, gjorde at skigruppa ikkje var representert denne gong. Det får bli ei vurdering om ein skal tilbake til at årsmøte er kvardagskost. Protokoll og årsmeldingar frå årsmøtet blir lagt ut når desse er klar.
read more…Besøk sidan februar 2009
Utstyrsleverandør
Hovudsponsorar
Sponsorar
