Hovudsponsorar
Sponsorar
Sponsorar
Endeleg er Balanseparken i Prestavikjo open!
Endeleg kan me seia det – Balanseparken i Prestavikjo er open! 🎉
Dette har vore eit prosjekt med utruleg mange flinke folk i sving, og me i Suldal IL er skikkeleg stolte av resultatet. Mange dugnadsfolk har lagt ned ein stor innsats for å få parken på plass, og utan denne fantastiske dugnadsånda hadde me ikkje vore der me er i dag.
Måndag 17. august vart dei siste detaljane monterte på parken. Tysdag 18. august var det planleggingsdag i barnehagen, og me bestemte oss difor for å laga ei litt spontan «pop-up»-opning klokka 12.00. Opninga vart berre lagt ut dagen før, så me visste ikkje heilt kva me kunne venta oss.
Men for ein respons! 🤩
Rundt 100 personar møtte opp for å vera med på opninga. Det er rett og slett heilt utruleg når ein tenkjer på at arrangementet berre vart annonsert dagen før. Det viser verkeleg kor mykje engasjement og interesse det er for aktivitetstilbodet i Suldal.
Ein ekstra stor takk må rettast til BG Suldal, som stod for grunnarbeidet i forkant av monteringa. Dei lånte også ut maskin til arbeidet med tilbakefylling, medan maskinføraren stilte opp på dugnad. Tilbakefylling og montering av modular og utstyr vart gjort på dugnad. Tusen takk til alle som stilte opp og bidrog med ein kjempeinnsats!
Me vil også rette ein stor takk til Statkraft, som lét oss lagra utstyret vårt hos dei fram til me fekk eige lagerbygg å oppbevara det i. Det har vore til stor hjelp for oss gjennom prosjektet. Tusen takk for at de stilte opp og hjelpte oss undervegs!
Bakka Industri Mek bidrog med flytting av modulane og monteringshjelp til balanseparken. Tusen takk for hjelpa og for at de stilte opp!
Sjølve Balanseparken er levert av Uniqa AS. Dei har vore svært gode å samarbeida med og har vist stor støtte og fleksibilitet undervegs. Me er svært nøgde med både samarbeidet og resultatet.
Det står framleis att litt arbeid før alt er heilt ferdig. Lys skal monterast av Ryfylke Elektro AS, og dette kjem på plass så snart det er klart. 💡
No håpar me at Balanseparken blir ein kjekk og mykje brukt møteplass for små og store, og at mange får glede av å klatra, balansera, leika og utfordra seg sjølve.
Tusen takk til alle som har bidrege – dette er dugnadsånd på sitt beste! 🙌
Opningsdagen – 18. august 2026.
Minst tre lastebilar med utstyr gjekk med til prosjektet.
Mykje og stort utstyr krev god lagerplass.
Endeleg er utstyret på veg frå lageret og klart for montering. Bakka Industri Mek stilte opp.
Grunnarbeidet er utført av BG Suldal, og dugnadsgjengen er godt i gang med å setja saman og skru fast modulane..
Oppi tønnene blir det fylt med betong.
Asfalt rundt gummidekket skal gi ein finare og meir solid finish.
Me var spente på korleis dei skulle få laga mønsteret i toppdekket som var lagt inn.
Gutane frå Lindeland Maskin er godt i gang med å leggja det gule topplaget.
Tom Gardsteig tok den siste finpussen før opninga.
Pop-up-opning med pop-up-kiosk.
G13 og J14(15) på Sørcup
Sommarferien kom brått på enkelte i år. Om det er Sør-cup eller skuleruta i Ryfylke som er ute av synk, veit eg ikkje, men det blei to dagar tidlegare ferie på nokre 12, 13, 14 og 15-åringar i år.
Suldalsgutane- og jentene sendte i år tre lag til cupen i Kristiansand. G13-gruppa hadde to lag med spelarar på 12- og 13 år. Desse spelar til vanleg saman på G13 i serien, nå blei dei blanda til to 7’ar-lag. Jentelaget vårt er laget som spelar i J15-serien. Med litt dispensasjonar fekk me delta i J14-klassen. J15-klassen i Sørcup er 11’ar-lag, og det er me ikkje nok spelarar til. Jentene fekk dermed stilla med 9’ar-lag i 14-årsklassen. Jentene på dette laget er 14 og 15 år. Til saman blei det 15 gutar og 11 jenter på cup.
Fredagen la me drittvêret bak oss, og over Hovden kom sol og varmegrader. Begge laga blei innkvartert på same skule, slik at me fekk sosialisert oss på tvers av både alder og kjønn.
Bilde og video heilt i botn av innlegget når de klikkar dykk inn på artikkelen.
read more…Utmerkingar for framifrå idrettsprestasjonar
Suldal Idrettslag har også i året 2025 vist godt igjen.
Suldal IL er heldige som har så mange dyktige og dedikerte utøvarar. Resultata i 2025 viser at det vert lagt ned mykje arbeid av både utøvarar, trenarar og føresette gjennom heile året. At fleire av våre løparar hevdar seg både på krets- og nasjonalt nivå, er noko heile idrettslaget kan vere stolte av.
Fleire utøvarar har prestert på eit nivå som kvalifiserer til utmerking for framifrå idrettsprestasjonar. Utmerkinga kan berre tildelast éin gong i kvar klasse.
Thomas Bakka, Simon Bakka og Jone Gjuvsland har alle motteke utmerkinga tidlegare i sine klassar, og vert difor ikkje tildelte ny utmerking sjølv om dei på nytt oppnår resultat som kvalifiserer.
Thomas Bakka
Thomas har levert sterke resultat på nasjonalt nivå gjennom sesongen. Han oppnådde topp 20-plasseringar i norgescup- og NM-renn:
- 15. plass på 10 km klassisk under Norgescupen i Molde
- 16. plass på 3,75 km klassisk under Norgescupen på Gjøvik
- 16. plass på 15 km klassisk under NM Junior på Lygna
Simon Bakka
Simon har hatt ein sterk sesong med fleire gode resultat:
- 7. plass i sprint fristil under Hovudlandsrennet
- Krinsmeister i sprintstafett under KM på Sandrip saman med Daniel Bakka
Jone Gjuvsland
Jone har igjen vist at han høyrer til blant dei beste i sin årsklasse:
- Krinsmeister i klassisk distanse på Brokke
- Krinsmeister i fristil under SI-rennet på Sandrip
- Krinsmeister i rulleski under KM på Sandrip
- 10. plass i fristil under Ungdommens Holmenkollrenn
- 17. plass i klassisk under Ungdommens Holmenkollrenn
Daniel Bakka
Så har me årets mottakar av utmerking for framifrå idrettsprestasjon, som òg har hatt ein god sesong.
Daniel Bakka får utmerking for framifrå idrettsprestasjon i 2025.
Årsmøtet i Suldal IL grunngir tildelinga med at Daniel Bakka:
- Vart krinsmeister (KM) i Rogaland og Agder skikrets på Vindbjartmixen, KM sprintstafett på Sandrip
Me gratulerer Daniel med utmerkinga og alle utøvarane med ein flott sesong.
Gruppeleiar for ski, Arvid Laugaland, overleverte utmerkinga til Daniel Bakka.
Sparebanken Norge slår på stortromma – igjen! Kr 400.000 til Prosjekt Prestavikjo!
Sparebanken Norge hadde i går ein ny runde med tildelingar til gode formål i Suldal, nesten 1,2 million kroner delte dei ut på kaien på Sand, og 1/3 av desse midlane gjekk til Prestavikjo.
Desse midlane gjer at me kan gå i gong med asfaltering av Nordre sving og få på plass etterlengta ballfangarnett, padeltennis og fleirbruksbane. Det er ikkje til å legga skjul på at pris på grunnarbeid og asfaltprisar er usikre og stadig endrande tal. Det hjalp ikkje på asfaltprisane at det blei blokkade i Hormuzstredet. Tilskotet frå Sparebanken Norge var gull verd og kom i akkurat rett tidspunkt. Hans Olav frå banken kom med den gode meldinga ti minutt før me skulle setta oss ned og sjå på økonomien i prosjektet, så det blei eit lystig møte, og eit kortare møte enn me hadde sett føre oss.
Med denne gåva har nå Sparebanken Norge gitt heile 1,4 million til «Prosjekt Prestavikjo – eit nærmiljøanlegg for alle!». Det er heilt fantastisk, og me er kjempeglade for å ha ein så solid støttepartnar. Det er også veldig kjekt at også mange andre i kommunen nyt godt av deira støtte. Vår gode nabo og samarbeidspartnar Suldal Samfunnshus fekk også 100.000 til energitiltak, noko me applauderer! Fleire andre i bygda, og totalt 18 organisasjonar i kommunen naut godt av gåverunden i vår.
Under ser de alle gåvemottakarane, og de kan lesa meir i Suldalsposten
Tusen takk nok ein gong!
Gåvesjekken frå SR-Bankstiftinga er på plass!
Som tidlegare meldt, støttar Sparebankstiftinga SR-Bank Prosjekt Prestavikjo med nye kr 100.000,- Desse pengane er øyremerka sandvolleyballbane.
Vibecke Helland frå SR-Bank kom og overrakte det synlege provet på gåva, og bildet blei tatt der sandvolleyballbanen skal komma. Det blir midt i søndre sving, og kanskje er den på plass til neste sommar.
Me takkar igjen for gåva frå banken, det er stas og ha dei med på laget!
6. div: Finnøy – Suldal 1-2
A-laget har nå tre strake bortesigrar og er i flyten. Nå står ein bortekamp mot Lura før tur før me endeleg får sjå laget vårt på heimebane i Prestavikjo i ein tøff kamp mot Hjelmeland laurdag 13. juni kl 13.00.
Det var ulike framkomstmiddel som måtte til for å komma seg til kamp. Ein liten smakebit her:
Denne gong nyttar me oss av eit balansert og godt referat frå Finnøy si lokalavis Øyposten. Klikk deg vidare i saka for og lesa.
read more…Sparebankstiftinga SR-Bank støttar Prosjekt Prestavikjo med nye kr 100.000!
Sparebankstiftinga har nok ein gong sett verdien av arbeidet me gjer for å gjera Prestavikjo til ein kjekk stad for flest mogleg, og har denne gong støtta med tilskot til sandvolleyballbane.
Denne banen er tenkt i søndre sving, bak målet mot Suldalslågen. Her er tanken at ein skal kunna spela både sandvolleyball, leika i sanden, og kanskje også legga til rette for sandhandball- og fotball.
Det er ikkje første gong Sparebankstiftinga SR-Bank støttar Prosjekt Prestavikjo. Første gong var då dei gav kr 100.000,- til tribune i 2022. Det er altså alt fire år sidan me starta opp med prosjektet, sjølv om bygginga ikkje tok til før i 2023. I 2023 gav stiftinga 500.000,- i generell støtte til Prosjekt Prestavikjo. I tillegg har dei også gitt kr 25.000,- i eldsjelgåve som er blitt lagt inn i prosjektet. Med tildelinga i år er SR-bank dermed oppe i totalt kr 725.000,- i støtte til Prosjekt Prestavikjo – eit nærmiljøanlegg for alle!
Suldal idrettslag takkar så mykje for støtta, desse midlane er heilt naudsynte for at me skal greia invisteringane me er i gong med, og ønskjer å halda fram med i Prestavikjo!
Kr 100.000 frå Sparebankstiftelsen Sauda til innreiing av utstyrslager
Suldal Idrettslag er svært takksame for å ha blitt tildelt kr 100 000 i prosjektstøtte frå Sparebankstiftelsen Sauda.
Støtta går til innreiing av utstyrsgarasjen, som er eit viktig tiltak for å sikre betre organisering av utstyr og meir effektiv drift i laget. Med ei betre tilrettelagt løysing vil både utøvarar, trenarar og frivillige få ein enklare og meir oversiktleg kvardag.
Tildelinga er ein del av ei større runde med prosjektmidlar til gode føremål i Sauda og Suldal, med mål om å styrke aktivitet, trivsel og gode møteplassar i lokalsamfunnet.
Suldal Idrettslag set stor pris på støtta frå Sparebankstiftelsen Sauda, som over tid har vore ein viktig bidragsytar til utvikling av laget og aktivitetstilbodet vårt.
Me takkar for tilliten og støtta.
👉Nye lagermoglegheiter for Suldal Idrettslag | Suldal idrettslag
Ryddedugnad i bygda!!
Tysdag ettermiddag 21.04 skal me ut og rydda lokalmiljøet for søppel – og tena pengar samstundes 
Bli med på Plastdugnaden og gjer ein forskjell! 
Dette er mogleg takka vere plastposekontingenten frå medlemmene i Handelens Miljøfond, med støtte frå SpareBank 1-stiftingane.
Tusen takk til dei lokale som støttar oss:
Coop Prix, som spanderer bollar og saft til ungane som skal vera med å rydda
Mibau Stema Norge, som held oss med eingongshanskar og søppelsekkar
Vinjar Skule blir òg med og bidreg! Og det er jo berre heilt fantastisk! Dei tek ein rydderunde fredag 24.04, og me håpar at store delar av osen er rydda etter dette 
Me syns det e så kjekt at så mange lokale bedrifter og skulen hiv seg med – det gjer det ekstra kjekt og viser ekte fellesskap.
Ta godt imot ungane som kjem rundt og ryddar hos oss 
Fotballkampar våren 2026
Nå er både a-lag og Suldalsgutane- og jentene i gong for fullt. Denne veka er det verkeleg full rulle i Prestavikjo, og meir blir det.
Fotballmaraton i Prestavikjo starta laurdag med a-laget, før J13 hadde sin første kamp på søndag. Måndag spelte G14, og i dag var det G15 sin tur. I morgon heimedebuterer G13, mens J15 avsluttar veka med kamp på måndag. Fleire har fått med seg alle kampane til nå, kor mange greier å kryssa av seks dagar på rad på tribunen i Prestavikjo!?
Her følgjer ei oversikt over kampane i Prestavikjo fram til sommaren. Legg også ved heimekampane som er klar etter sommaren (a-lag og Suldalsserie). Terminlista for Suldalsgutane- og jentene for hausten kjem i sommar. Det blir mange høve til å sjå fotball i år også.
Dei kampane som er merka gult skal det i utgangspunktet vera kiosk på. Kaffi skal det i tillegg vera råd og få kjøpt på dei fleste Suldalsgutane- og jentene-kampane.
Vår eminente SoME-ansvarlege Tom vil nok legga ut mange påminningar om kamp, han har lagt lista høgt!
Vèl møtt!
Besøk sidan februar 2009
Utstyrsleverandør
Hovudsponsorar
Sponsorar
