Prestavikjo frå lufta juni 2024. Foto Tom Gardsteig.
Straks går BG Suldal og Ola Fisketjøn i gang med meir grunnarbeid i Prestavikjo, og JK Elektro vil strekka kablar og montera lysmaster. Hausten blir prega av grøftegraving og opparbeiding av rulleskiløype, offisielt kalla asfaltert turveg.
Ver gilde å ta omsyn til graving og maskiner.
Hugs å gi barn og ungdom beskjed om å kikka seg godt rundt. Alt av utsyr, maskiner og gjerde må få stå i fred!
Pompeløypo og 3’ar-banar er tatt i bruk og må seiast å vera ein suksess. Desse er bortimot ferdige, men begge anlegga skal få lys slik at brukstida blir lenger utover kveldane vår og haust. Me skal også pynta meir rundt begge anlegg. Tribunen er også tatt i bruk. Her skal det sjølvsagt bli mykje betre tilgang nedanfrå, mest sannsynleg med ei trapp, og så skal det komma asfalt både ned og oppe. Då skal ein lett kunna gå mellom fotballbane, gjennom tribune og opp til toalett, foaje og med tida ein kiosk. Rundt tribunen vil det bli sådd slik at ein skal sleppa og sjå på brun mold. Nedst i innlegget ser de ein flott dronevideo av korleis området ser ut nå.
Ein av hovudsponsorane våre, Statkraft, gir kr 10.000,- til Prestavikjo. Det er kjekt å ha næraste nabo med på laget!
Midlane kjem gjennom ordninga «Min hjertesak», der dei ansatte kan nominera prosjekt som kjem nærmiljøet til gode. Ordninga gir kr 10.000,- til formåla dei støttar. Den ansatte som har nominert har sjølv brukt utallige timar i Prestavikjo og i fotballen i Suldal IL, både som stødig midtstoppar, trenar, oppmann, fotballgruppemedlem og i mange andre roller. I «gamle dagar» festa han slådda på bilen og løyste opp den frosne grusen i nordre sving før vintertreningane til a-laget. Spør ein denne karen om noko, så er svaret alltid «Jøsses ja!»
Statkraft kom til bygda då Ulla-Førre-prosjektet(Usikker kjelde: Wikipedia.org) skulle realiserast, og var ein viktig støttespelar då fotballbanen blei etablert i 1977. Dei stod med anna for at det blei lys på banen alt då, lys som i dag er 45 år og modent for utskifting.
Under prosjektet me nå held på med, bidreg Statkraft i tillegg til denne gåva med lagringsplass og lån av diverse utstyr som me har bruk for. Som hovudsponsor gjennom fleire ti-år, er og har Statkraft vore viktig for aktiviteten i Suldal IL.
Hallvard på Montèr Suldal var ikkje vond å be då me hadde bruk for materialar til 3’ar-banen. Tusen takk for det!
Det var behov for 150 meter med 2×4 for å sikra oss at vanta til 3’ar-banane ikkje kom ut av stilling då det skulle støypast. Såpass mange meter utgjer fleire tusen kroner, så me er svært glade for at vår lokale byggvarehus hadde lyst til å hjelpa oss med dette.
Montèr Suldal på Garaneset bør vera kjent for dei fleste, men kanskje veit ikkje alle at det er Noregs største byggvarekjede med 140 byggvarehus rundt i landet. Montèr er ein del av Optimera AS.
På grunn av naudsynt utskifting av lysmaster på kunstgrasbanen, er det framleis behov for meir midlar for å få alt på plass. Her stilte Sparebankstiftelsen Sparebanken Vest opp igjen med kr 200.000,-. Totalt har banken gitt kr 800.000,- til prosjektet!
Det har tidlegare komme kr 100.000,- til tribune som nå er på plass, og kr 500.000,- til resten av prosjektet. Sparebanken Vest, som er ein av hovudsponsorane våre, stiller på denne måten opp som ein svært viktig del av anlegget som etter kvart kjem på plass i Prestavikjo.
Første element i nærmiljøanlegget i Prestavikjo blir opna for bruk i dag! Det er klart for hopp og sprett på hjul, og kanskje litt knall og fall?
I ein pumptrackbane skal du komma deg framover i ei kupert og dosert løype ved å «pumpa» deg framover på sykkel, sparkesykkel, rullebrett, rulleski eller liknande. Ein skal altså ta med seg farten ein får nedover til å komma seg opp neste kneik.
Det er Trailhead Nesbyen som har bygd Prestavikjo pumptrack på oppdrag frå Uniqa. BG Suldal, med Steinar bak spakene i gravemaskina, har stått for grunnarbeid og hjulpe Trailhead med oppbygginga av banen. Dei siste dagane har NCC asfaltert løypa.
Pumptrackar blir bygde opp noko ulikt. Nokre plasser er det berre grus, andre plassar blir alt asfaltert, også skråningar. I vår pumptrack er det berre asfaltert der det er naturleg at ein brukar banen. Sidekantar og midtfelt i grus vil få eit dekke av eitt eller anna slag etter kvart. Me reknar med at folk ikkje klatrar og syklar der det ikkje er asfalt.
Det går også an å nytta pumptracken med til dømes radiostyrte bilar. Det som ikkje skal vera på banen er mopedar og liknande.
Me håpar at pumptracken vil falla i smak, at ein er forsiktig og viser hensyn, og utviklar røynslene sine etter kvart. Her skal vera utfordringar frå nybegynnarar til vidarekomne. HUGS HJELM.
Vår lokale helt, Steinar frå BG Suldal, har styrt gravemaskina og fått god kompetanse på bygging av pumptrack.Knut frå Trailhead har stått for teikning og bygging av Prestavikjo pumptrack.NCC har eit eige team som har spesialisert seg i å asfaltera pumptrack.
Det er mange tonn med grus, pukk og singel som skal til for å få godt underlag til alt som skal byggast i Prestavikjo. Totalt for heile prosjektet er det snakk om 2-3000 tonn av ulike fraksjonar. At me får dette gratis hjelper godt på prosjektet!
Verdien av denne gåva veit me ikkje før heile prosjektet er over, men at det er snakk om eit betydeleg beløp er det ikkje tvil om. Norsk Stein har tidlegare løyvd kontantgåve på kr 20.000,-, så dette kjem i tillegg.
I haust er det ikkje snakk om så store mengder, men neste haust reknar og håpar me på at det er vesentleg meir som skal inn når me skal til med asfaltering til rulleski og underlag til andre aktivitetsanlegg som skal på plass.
