Testrenn med julegraut

Kunstsnøen sikra at 46 ivrige skiløparar fekk testa løpsforma på Gullingen tysdag kveld. Suldal IL diska i tillegg opp med graut og juleavslutning.

Tidlegare i vinter fekk ein starta produksjon av kunstsnø på Gullingen, og lagt eit godt grunnlag i deler av lysløypa. Dette sikra at Suldal IL sist tysdag kunne arrangere testrenn og juleavslutning. Regnet hadde nemleg herja godt med løypene på forhand, og sjølv om snøen kom på renndagen var ein avhengig av basen med kunstsnø. Løypekøyraren, Bjørn Egil Nerheim, stilte opp og la til rette så godt han kunne, trass nedbøren som verkeleg slo til utover kvelden.  

– Det er på slike dagar ein ser kor viktig kunstsnøen er for å sikre at ein kan arrangere fleire skirenn, sjølv om vêret ikkje speler på lag. Det var verkeleg kjekt at så mange deltok, og at me fekk testa ei god gjennomkøyring av arrangementet, fortel leiar i skigruppa Magnus Lunde Bakka.

Sidan idrettslaget skal arrangere fleire skirenn i løpet av vinteren er det godt å kunne teste at tidtaking og organisering flyt slik det skal. Testrennet var lagt opp med fastsette løypelengder for alle aldersgrupper, det viktigaste denne dagen var likevel å sikre at organiseringa var på plass. Skiløyparane gav alt dei hadde i løypa før dei tok turen inn på Gullingenhuset for graut, basar med flotte premiar og takk og heider til dei som har stilt opp for skigruppa gjennom året som har gått.

G14 til topps på Score Cup!

Vinnarlaget 2023: Frå venstre: Samuel Lunde, Stian Myklebust, Roald Emuge Oluka, Michal Kral (trenar), Jørgen Aadnøy, Ondra Kral, Rasmus Sundseth Steine, Emil Hagen, Jostein Marvik Hølland, Anders Warhaug (trenar), Levi Lundal Warhaug, David Gjil, Trygve Mehus Rugland. Framme f.v.: Tor Olav Aarhus, Veigar Elia Gudding Eyfjord

Suldalsgutane- og jentene har vore med nokre år på Score Cup i fotballhallen Vår Energi arena på Randaberg. I år gjekk G14-laget heilt til topps! Det er ein strålande prestasjon, og her kjem reisebrev frå turen og cupen. Veronica Lundal Warhaug står for tekst, mens Michal Kral har teke bilda.

Det var ein spent, og litt trøytt, gjeng som reiste tidleg frå Suldal søndag morgon for å vera med på Score Cup på Randaberg. 

For nokon var dette deira første kamp på Suldalslaget, og eg trur fleire kjente litt på nervøsiteten av å møta store gutar frå byn. 

read more…

Statkraft støttar Prosjekt Prestavikjo med kr 10.000!

Ein av hovudsponsorane våre, Statkraft, gir kr 10.000,- til Prestavikjo. Det er kjekt å ha næraste nabo med på laget!

Midlane kjem gjennom ordninga «Min hjertesak», der dei ansatte kan nominera prosjekt som kjem nærmiljøet til gode. Ordninga gir kr 10.000,- til formåla dei støttar. Den ansatte som har nominert har sjølv brukt utallige timar i Prestavikjo og i fotballen i Suldal IL, både som stødig midtstoppar, trenar, oppmann, fotballgruppemedlem og i mange andre roller. I «gamle dagar» festa han slådda på bilen og løyste opp den frosne grusen i nordre sving før vintertreningane til a-laget. Spør ein denne karen om noko, så er svaret alltid «Jøsses ja!»

Statkraft kom til bygda då Ulla-Førre-prosjektet (Usikker kjelde: Wikipedia.org) skulle realiserast, og var ein viktig støttespelar då fotballbanen blei etablert i 1977. Dei stod med anna for at det blei lys på banen alt då, lys som i dag er 45 år og modent for utskifting.

Under prosjektet me nå held på med, bidreg Statkraft i tillegg til denne gåva med lagringsplass og lån av diverse utstyr som me har bruk for. Som hovudsponsor gjennom fleire ti-år, er og har Statkraft vore viktig for aktiviteten i Suldal IL.

Tusen takk for gåva!

Montèr Suldal støttar Prosjekt Prestavikjo med materialar!

Hallvard på Montèr Suldal var ikkje vond å be då me hadde bruk for materialar til 3’ar-banen. Tusen takk for det!

Det var behov for 150 meter med 2×4 for å sikra oss at vanta til 3’ar-banane ikkje kom ut av stilling då det skulle støypast. Såpass mange meter utgjer fleire tusen kroner, så me er svært glade for at vår lokale byggvarehus hadde lyst til å hjelpa oss med dette.

Montèr Suldal på Garaneset bør vera kjent for dei fleste, men kanskje veit ikkje alle at det er Noregs største byggvarekjede med 140 byggvarehus rundt i landet. Montèr er ein del av Optimera AS.

Takk for gåva!

Sparebanken Vest slår til med nye kr 200.000,- til Prosjekt Prestavikjo!

På grunn av naudsynt utskifting av lysmaster på kunstgrasbanen, er det framleis behov for meir midlar for å få alt på plass. Her stilte Sparebankstiftelsen Sparebanken Vest opp igjen med kr 200.000,-. Totalt har banken gitt kr 800.000,- til prosjektet!

Det har tidlegare komme kr 100.000,- til tribune som nå er på plass, og kr 500.000,- til resten av prosjektet. Sparebanken Vest, som er ein av hovudsponsorane våre, stiller på denne måten opp som ein svært viktig del av anlegget som etter kvart kjem på plass i Prestavikjo.

Tusen takk for gåva!

Protokollar frå styremøte Suldal IL

Det blir sjølvsagt skrive protokoll/referat frå møte i Suldal IL sitt styre. Desse vil me skal vera tilgjengelege for medlemmer.

Me har ikkje vore så flinke til å legga ut dei siste åra, veit ikkje om me kan skylda på korona. Dette skal me gjera betre framover. De vil finna protokollane i menyen under «Styret og medlemsinformasjon» og vidare «Styret informerer«.

Siste protokoll er frå møtet 18.10.2023. Er de interesserte i å vita kva som blir diskutert og vedteke, så kan de inn og forvitna dykk her.

Avslutning Suldalsserien 2023

Den årvisse avslutninga av Suldalsserien gjekk som vanleg føre seg i gymsalen.

Fast program dette året også:

  • Premieutdeling til spelarar, trenarar, banemannskap og dommarar.
  • Pølser, brus og kaffi.
  • Trekning av gåver frå sponsorar.

I år var det litt færre premiar, men det var desto meir solide saker som blei lodda ut. Sparebanken Vest, Statkraft og Haugaland Kraft stilte med fruktkorger, gåvekort, sekkar, glas, karaffel, solide drikkeflasker, fotball, paraply og sitteunderlag. Tusen takk til alle!

Me er også blitt lova nokre premiar frå samarbeidsklubben FK Haugesund. Dei som ikkje vann, vil derfor få ein ekstra vinnarsjanse når me får desse i hende. Informasjon om dette kjem når me har det klart.

Sesongen er altså slutt, noko som betyr planlegging av ny sesong. I 2024 er det Suldal IL som skal arrangera Suldalsserie og cup. Takk for i år, og vel møtt neste år!

PS: Nokre lag held fram med trening utover i november.

6. div: Suldal – Madla 3 3-4 (0-2)

Referatet frå heimekampen mot den suverene divisjonsvinnaren kjem noko seint, men her er det!

Med stortap mot Madla 3 på bortebane friskt i minnet, så var det ein revansjesugen gjeng som skulle visa at det er tøft å komma til Prestavijko! Dette skulle tabelltoppen få kjenna på, det var ikkje langt frå at Suldal karra til seg poeng. Nå, når serien er slutt, veit me at Madla 3 vann 17 av 18 kampar, den siste spelte dei uavgjort mot tabelltoar Fiskå. På torsdag spelar dei KM-sluttspel mot vinnaren av nordpulja, Ølen.

Til dette referatet kviler me på assistenttrenar Jone Utbjoa sine SMS-notat:

read more…

Gratulerer med opprykk, Mari!

Mari rykker opp til 1. divisjon med Viking FK!

I går sikra Viking FK sitt damelag opprykk til nesthøgaste nivå, 1. divisjon. Med på laget er Mari Fisketjøn Indrebø. Suldal IL gratulerer!

Etter at Mari flytta frå Suldal for å gå på vidaregåande, har ho vore del av dette framstormande damelaget. Viking har vore nære på å rykka opp frå 2. til 1. divisjon i fleire år, men nålauga er trongt. Berre eitt lag rykkar opp, så ein kan nesten ikkje ha feilsteg gjennom sesongen. Det bli også mykje reising. I divisjonen er det 14 lag frå heile Sør-Noreg, frå Grimstad til Trondheim og Viking til Tynset. Det er framleis to kampar igjen, men leiinga ned til Molde på 2. plass er 11 poeng. Sjølv om Molde har ein kamp mindre spelt, så kan dei ikkje ta igjen forspranget.

Viking har kun eitt tap, og i kampen mot Bryne på 4. plass i går viste dei verkeleg at dei nå er klar for spel eit nivå opp. Viking stoppa ikkje før det stod 0-7 på Bryne, og det var klart for feiring. Mari spelte dei siste 20 minutta i går. Neste år blir det altså 1. divisjon, og endå lenger reiser. Her er både Tromsø og Bodø lag ein skal bryna seg mot.

Ein skulle tru at ein då ville møta eit anna lokallag; Klepp. Dessverre er ikkje laget der like sterkt som det var då Mari si mor, Siri spelte der i toppserien for nokre år sidan. Det har vore sterk konkurranse om spelarane mellom laga på vestlandet dei siste åra, og Klepp er ikkje lenger det sjølvsagte valet slik det var før. Nå kjempar Klepp, Viking, Avaldsnes, Staal og laga frå Bergen om dei same spelarane. Nå kan det sjå ut som at Viking skal stadfesta posisjonen som det nestbeste kvinnelaget i regionen, så får me sjå om Avaldsnes greier å halda plassen i Toppserien, eller om dei rykker ned og møter Mari og VIking til Rogalandsderby neste år.

Dersom de har innlogging på Stavanger Aftenblad, kan de lesa meir her: Aftenbladet.

Tabellar og resultat finn de på fotball.no.

Besøk sidan februar 2009

Ulike kategoriar

Utstyrsleverandør

Hovudsponsorar

Suldal IL på Facebook

Reiserekning

Her kan du laste ned reiserekning. Oppdatert 2020.

Grasrotandelen

Kor mykje har me fått i Grasrotandelen? klikke her!

For å registrere deg, send SMS. Skriv:
GRASROTANDELEN 983958605 til 2020 (tenesta er gratis), eller ta kontakt med tippekomisjonæren din.