Tribunearbeidet i gong
Så er også arbeidet på haustens tredje anlegg, tribunen, i gong. Ola Fisketjøn AS har starta gravinga i skråninga opp mot Samfunnshuset.
Her skal det komma tribune med 96 sitteplasser. Det blir plassert på eit platå halvvegs inn i bakken. Der vil ein få god oversikt over det som skjer på fotballbanen. Saman med tribunen blir det laga trapp/veg opp frå banen til garderobane til Samfunnshus. Etter kvart vil også kiosken kokmma her oppe.
Ola Fisketjøn AS har god kjennskap til Prestavikjo, dei var også med då sjølve idrettsanlegget blei etablert på 70-talet, og stod også for mykje av arbeidet då kunstgraset kom for 11-12 år sidan.
Når grunnarbeidet er på plass, så kjem leverandøren av tribunen og moterer denne. Me reknar med at alt er på plass i løpet av oktober, det kjem litt an på leveranse.
Gravemaskina står klar!
Prosjekt Prestavikjo er i gong! Måndag 4. september rulla BG Suldal AS inn gravemaskina der pumptracken skal etablerast.
Denne veka startar grunnarbeidet til det som skal bli ein flott pumptrackbane i sørvestre hjørne av stadion. For dei uinvidde er pumptrack ein asfaltert, kupert bane med doserte svingar, humpar og hopp som ein kan sykla på. I tillegg til sykkel kan den nyttast med sparkesykkel, rulleskøyter, rullebrett og kanskje rulleski. Det kan også vera ein kjekk plass å prøva radiostyrte bilar.
BG Suldal AS kjem også til å grava grøfter slik at ein kan strekka straumkablar til framtidige anlegg, og gjera grunnarbeidet for å laga til tre stk 3’ar-banar til fotball i det søraustre hjørnet, ved ballbua. Dette er spesialtilpassa småbanar med vant for dei yngste fotballspelarane, men vil også gi god trening for eldre spelarar. Her vil ballen alltid vera i spel! Kan hende kan ein også nytte desse til fotballtennis. Kvar bane er 15m x 10m.
Me gler oss!
Sprøytinga i Prestavikjo har gitt resultat
Det er nokre veker sidan Per Even frå Suldal Service AS gjekk over «indre bane» for å ta knekken på alt som veks uhemma der.
Me ser det har verka, og det som ein gong spirte litt vel friskt er nå daudt og vese. Alt skal ligga til rette for grunnarbeid for entrepenørane nå.
Takk til Suldal Service AS for første del av det fysiske arbeidet i Prosjekt Prestavikjo!
Røldalcup 2023
Nok ein gong viste Røldal og sola seg frå si beste side då 15 lag tok turen frå Suldalsosen og opp til nabobygda på cup.
Det er tredje gong me mobiliserer for å delta på cupen som gir spelarane våre høve til å spela saman i reine årskull og på reine jente- og gutelag. Det er jo slik dei spelar i byane, men for oss i Suldal så er det ikkje så ofte me får sjansen til dette.
Spesielt kjekt er det nok for dei aller yngste. Denne cupen kjem berre to veker etter at 6-åringane har starta i 1. klasse. Med to treningar i bagasjen på førehand, er dei svært klare for cup. Dette må jo vera ein flott arena for å bygga klassemiljø i starten av skuletida. 11 av førsteklassingane var i aksjon i 3ar-bingen, og dei fekk spelt mange kampar og skåra mykje mål.
read more…6 div avd 3 Paradis 1-1 Suldal
Etter at kampen mot Sunde 2 vart utsatt, var det Paradis som skulle bli vår andre kamp for haustsesongen. Paradis er eit lag me har møtt fleire gonger opp gjennom åra. For få år sidan var det nettopp Paradis som nekta oss opprykk til 5 divisjon, då dei slo oss med eit poeng i siste kamp. Nå er dei nede i 6 divisjon igjen og har hatt ein sesong med vekslende resultat. Sist me møttes vant Suldal 2-1 i Prestavikjo.
read more…Skitreninga startar
-
Den eldste gruppa (6.kl og oppover) startar opp tysdag 29.august, kl. 18.30. Oppmøte ved Samfunnshuset. Dei startar med desse treningstidene: tysdagar kl.18.30 og torsdagar kl.18.30. På torsdagane er også dei som ønskjer frå 5.kl. velkomne til å vera med.
-
Mellomgruppa (4.-5.kl.) har trening på tysdagar. Dei startar opp tysdag 29.august. kl.18.30 utanfor Samfunnshuset. Første trening føregår på rulleski.
-
Den yngste gruppa (1.-3.kl.) startar opp tysdag 12.september utanfor Vinjar skule. Meir informasjon kjem som «ranselpost» og her på FB, når det nærmar seg.
6 div avd 3 Madla 3 8-2 Suldal
Endelig klart for lokalfotball og dette gjeld også for Suldal. For dei som har sett på terminlista kan ein sjå at det er to lag Suldal ikkje møtte på vårsesongen, og Madla C er eitt av desse. Dei bråkledde frå Madla er ei god blanding med tidlegare stjerner frå andre, tredje og fjerde divisjon, ispedd gode spelerar frå femte divisjon. Dei rykka opp før denne sesongen etter å ha putta over 120 mål i 7 divisjon i 2022 sesongen.
Prestavikjo stengt i helga
Det blir sprøyta med plantevernmiddel rundt kunstgrasbanen i Prestavikjo fredag ettermiddag eller laurdag føremiddag. Området blir derfor stengt i helga. Det er ikkje fare for liv og helse, men for å vera godt innanfor retningslinjer så stenger me området i helga.
For dei laga som har starta opp trening, vil det vera trening som vanleg frå måndag.
Bingen er sjølvsagt open slik at ein kan få spelt fotball der.
Sprøytinga blir gjort for å klargjera massane til grunnarbeid på Prosjekt Prestavikjo.
Vennskapskamp: Suldalsgutane G15+ – Hope Stars, Zimbabwe 3 – 5
Onsdag 9. august tjuvstarta haustsesongen i Prestavikjo med vennskapskamp mellom to lag med svært ulik bakgrunn. Felles for begge lag er at dei likar å spela fotball!
Tidleg i sommar fekk me førespurnad frå utflytta, men stadig tilbakevendande, sandbu Anita Svendheim om me hadde eit fotball-lag i alderen 14-17 år som kunne vera interessert i ein fotballkamp. Det hadde me jo, så ein avtale blei sett. Laget som kom på besøk var Hope Stars.
Anita reiste i sin ungdom ut i verda og såg ting som både var kjekt, og ting som ikkje var kjekt. Å møta foreldre- og heimlause barn i Zimbabwe gjorde så stort inntrykk på henne, at ho måtte finna ein måte å hjelpa dei på. Saman med nokre andre ungdommar danna dei organisasjonen Midland Children’s Hope Project, også kalla Hopeproject.no. Ved å klikka seg inn på denne sida kan ein lesa mykje om organisasjonen, korleis dei jobbar og korleis ein kan vera med og hjelpa. Her kan ein til dømes velja å bli fast givar. «Ingen kan gjera alt, men alle kan gjera litt.»
read more…
Gode suldalsresultat på Blinkfestivalen
Blinkfestivalen byr på både skiglede, kriblande spenning, gode resultat og kameratsleg konkurranse. Gjengen frå Suldal viste, som alltid, godt igjen i rulleskiløypene.
Blinkfestivalen vart arrangert for 18 gong i år, og er ein populær skifest både for deltakarar, støtteapparat og publikum. I år leverte 13 suldølar gode løp i dei spanande konkurransane, der det var imponerande mange påmelde totalt. I løpet av festival-helga kan ein få prøve seg på motbakkeløp i Lysebotn, klassisk renn for den eldste gruppa i Ålgård eller fellesstart og sprint-løp midt i Sandnes Sentrum.
– Innsats, sportsglede, samhald og det sosiale var upåklageleg heile helga. Det var også veldig stas at me hadde heiagjeng frå Suldal heilt frå Lysebotn til Sandnes, seier leiar i ski-gruppa til Suldal IL, Magnus Lunde Bakka om årets utgåve av Blinkenfestivalen.
read more…Besøk sidan februar 2009
Utstyrsleverandør
Hovudsponsorar
Sponsorar
